राजकुमार ओली, बिर्तामोड: २३ फागुन (बाटिका अनलाइन)
प्रतिनिधिसभा सदस्य पदको निर्वाचनअन्तर्गत झापा निर्वाचन क्षेत्र नम्बर ३ मा राष्ट्रिय स्वतन्त्र पार्टी (रास्वपा)का उम्मेदवार प्रकाश पाठक फराकिलो मतान्तरसहित निर्वाचित भएका छन्।
बाह्रदशीका फुलबारीको स्थायी बासिन्दा पाठकले निकटतम प्रतिस्पर्धी राष्ट्रिय प्रजातन्त्र पार्टी (राप्रपा)का केन्द्रीय अध्यक्ष राजेन्द्रप्रसाद लिङ्देनलाई २१ हजार ३८० मतान्तरले पराजित गर्दै पहिलो पटक प्रतिनिधिसभा सदस्यमा विजय हासिल गरेका हुन्।
मुख्य निर्वाचन अधिकृतको कार्यालयका अनुसार पाठकले ३८ हजार ६७४ मत प्राप्त गरेका छन् भने लिङ्देनले १७ हजार २९४ मत प्राप्त गरेका छन्। यसअघिको २०७९ सालको प्रतिनिधिसभा निर्वाचनमा भने लिङ्देन यसै क्षेत्रबाट विजयी भएका थिए।
यस पटकको निर्वाचनमा पाठकले सुरुदेखि नै अग्रता कायम गर्दै आएका थिए। मतगणनाको प्रारम्भिक चरणदेखि नै उनले उल्लेख्य मतान्तर बनाउँदै लगेका थिए। शहरी तथा ग्रामीण दुवै क्षेत्रमा मतदाताबाट राम्रो समर्थन प्राप्त भएपछि उनको अग्रता निरन्तर बढ्दै गएको निर्वाचन अधिकृतको कार्यालयले जनाएको छ।
निर्वाचन परिणामअनुसार नेपाली कांग्रेसका उम्मेदवार राजेन्द्रकुमार घिमिरेले आठ हजार १९९ मत प्राप्त गरेका छन् भने नेकपा (एमाले)का उम्मेदवार हरिबहादुर राजवंशीले सात हजार ४९२ मत हासिल गरेका छन्। त्यस्तै श्रम संस्कृति पार्टीका दीपक तिम्सिनाले सात हजार ३३९ मत प्राप्त गरेका छन्। नेपाली कम्युनिष्ट पार्टीका उम्मेदवार डिल्लीराम घिमिरे (हिक्मत)ले एक हजार ४५० मत प्राप्त गरेका छन्।
झापा क्षेत्र नम्बर ३ मा यस पटक विभिन्न दलका प्रभावशाली उम्मेदवारबीच प्रतिस्पर्धा भए पनि मतदाताले नयाँ नेतृत्वतर्फ झुकाव देखाएको विश्लेषण गरिएको छ। राजनीतिक रूपमा चर्चित व्यक्तित्व मानिएका राप्रपा अध्यक्ष लिङ्देनलाई पराजित गर्दै पाठकले उल्लेख्य मतान्तरसहित विजय हासिल गर्नु यस क्षेत्रको महत्वपूर्ण राजनीतिक घटनाका रूपमा हेरिएको छ।
निर्वाचन आयोगका अनुसार यस क्षेत्रमा एक लाख ४० हजार ८५७ मतदाता रहेका थिए। तीमध्ये ८८ हजार ५६१ मत खसेको थियो। कुल खसेको मतमध्ये पाँच हजार ६२९ मत बदर भएको मुख्य निर्वाचन अधिकृतको कार्यालयले जनाएको छ।
मतगणना सम्पन्न भएसँगै पाठक निर्वाचित भएको घोषणा गरिएको हो। निर्वाचन परिणाम सार्वजनिक भएपछि उनका समर्थकले विजयी उत्सव मनाएका छन्।
पहिलो पटक प्रतिनिधिसभामा प्रवेश गरेका पाठकले निर्वाचन परिणामलाई जनताको परिवर्तनको चाहनाको अभिव्यक्तिका रूपमा लिएको प्रतिक्रिया दिएका छन्। उनले मतदाताले देखाएको विश्वासलाई सम्मान गर्दै विकास, सुशासन र जनताका अपेक्षा पूरा गर्न प्रतिबद्ध भएर काम गर्ने बताएका छन्।
झापा क्षेत्र नम्बर ३ को यस निर्वाचन परिणामलाई नयाँ राजनीतिक शक्तिप्रति बढ्दो जनसमर्थनको संकेतका रूपमा पनि विश्लेषण गर्न थालिएको छ।

लेखकको बारेमा

बाटिका अनलाइन